आयो मेलो आज बाबा रो रूनीचा नगरी चालनो भाईडा रे
आयो मेलो आज बाबा रो,
दोहा – धोरां धरती मायने,
और बाबा रो दरबार,
रंग गुलाल उडे जटे,
भई रामदेवजी रे द्वार।
आयो मेलो आज रे,
रूनीचा नगरी चालनो भाईडा रे,
रूनीचा नगरी चालनो भाईडा रे ओ जी,
जग में मोटो नाम बापजी रो,
जग में मोटो नाम रे,
अब पैदल पैदल चालता पीरा रे ओ,
अब पैदल पैदल चालता पीरा रे ओ जी।।
मास भादवा माय बापजी,
मास भादवा माय रे,
आ बीज आवे चांदनी धणीया री ओ,
आ बीज आवे चांदनी धणीया री ओ जी,
मेलो लागे जोर पीरा रो,
मेलो लागे जोर रे,
वटे ढोल नगाडा बाजता धणीया रे ओ,
वटे ढोल नगाडा बाजता धणीया रे ओ जी।।
पैदल पैदल चाल भाईडा,
पैदल पैदल चाल रे,
अब गुण बाबा रा गावसा भाईडा रे,
अब गुण बाबा रा गावसा भाईडा रे ओ जी,
जय बाबा री बोल भाईडा,
जय बाबा री बोल रे,
थारो मनडो शुद्ध होवसी भाई रे,
थारो मनडो शुद्ध होवसी भाईडा रे ओ जी।।
द्वारिका रा नाथ बापजी,
द्वारिका रा नाथ रे,
ए धोरां धरती आविया अन्नदाता रे,
ए धोरां धरती आविया अन्नदाता रे ओ जी,
अजमल घर अवतार बापजी,
अजमल घर अवतार रे,
ऊंडू काश्मीर आविया अन्नदाता ओ,
ऊंडू काश्मीर आविया अन्नदाता ओ जी।।
ओ बडा विरमदेव भाईडा,
बडा विरमदेव रे,
ए छोटा कहिजे रामदेव अन्नदाता रे,
ए छोटा कहिजे रामदेव अन्नदाता रे ओ जी,
अरे लाच्छा सुगना बहन बाबा री,
लाच्छा सुगना बहन रे,
ओ रतनो हाजिर रेवतो धणीया रे ओ,
ओ रतनो हाजिर रेवतो धणीया रे ओ जी।।
अरे अमरकोट रे माय बापजी,
अमरकोट रे माय रे,
आ नेतल कहिजे पांगली भाईडा रे,
आ नेतल कहिजे पांगली भाईडा रे ओ जी,
हथलेवा रे माय बापजी,
हथलेवा रे माय,
नेतल ने पगलीया देवीया अन्नदाता रे,
नेतल ने पगलीया देवीया अन्नदाता रे ओ जी।।
भगता री अरदास पीरजी,
भगता री अरदास,
थे सुनता वेगा आवजो अन्नदाता रे,
थे सुनता वेगा आवजो अन्नदाता रे ओ जी,
गावे चरना माय बापजी,
गावे चरना माय रे,
भगता री लजीया राखजो रामाजी रे,
भगता री लजीया राखजो रामाजी रे ओ जी।।
गायक – श्याम पालीवाल जी।
प्रेषक – मनीष सीरवी।
(रायपुर जिला पाली राजस्थान)
हिंदी · Read on Bhajan Baan
Share this bhajan with your family
Send it to your satsang group before kirtan so everyone has the words.
