राम नाम भजीया ज्याने,
मोती महल मिलीया रे,
हे पहाडा मे तप करीयो,
ज्याने राज मिलीयो रे,
के जूने जोधाणे,
अरे पहाडा मे तप करीयो,
जियो जियो रे जूने जोधाणे,
परमेश्वर पत्ता लिखने दिना रे,
ए हे हसने बोलो सबसु भाया,
अनेचो मत राखो रे,
अरे हसने बोलो सबसु भाया,
हे थोड़ा दिना रो जीवनो,
भलाई लेलो रे,
के ओची उमर मे,
जियो जियो रे ओची उमर मे,
संसार में भलाई लेलो रे,
ए हे उठते प्रभाते भाया,
राम कृष्ण ने सिमरो रे,
अरे उठते प्रभाते भाया,
हे राज करण री वेला भाया,
वेगा उठो रे,
के रिजग बाटीजे,
जियो जियो रे रिजग बाटीजे,
प्रभाते राम रो सुमिरन करलो रे,
ए हे खेजडला री देवी माता,
नाहर ने सिणघारे रे,
अरे खेजडला री देवी माता,
अरे नाहर ने सिणघार देवी,
हेलो मारे रे,
के सुनजो सिरदारा,
जियो जियो रे सुनजो सिरदारा,
झगड़ा मे थारी जीत वेला रे,
ए हे वडलीवाला भेरूजी,
थारो कालो डोरो बांधु रे,
अरे वडलीवाला भेरूजी,
हे रेखलीया जोताय थारी,
जात देवु रे,
के भेरू वडली रो,
अरे रेखलीया जोताय थारी,
जियो जियो रे भेरू वडली रो,
बांज्या ने बेटा देवे रे,
ए हे चंदा थारे चांदने,
तारा रो तेज मोलो रे,
अरे चंदा थारे चांदने,
हे सीताजी रे ढोलीये,
हनुमंत रो पेरो रे,
के ढलती रात रो,
अरे सीताजी रे ढोलीये,
हा हा रे ढलती रात रो,
रखवाली बाबो पक्की राखे रे,
ए हे केशर घोडी कालवी,
भालाला थाने सोवे रे,
अरे केशर घोडी कालवी,
हे लीलो घोडो नवलखो,
रामदेवजी ने सोवे रे,
के भाया रूनीचे,
अरे लीलो घोडो नवलखो,
जियो जियो रे भाया रूनीचे,
कलजुग मे भाया परचा भारी रे,
के बाबो रूनीचे।।
ए हे पाबू थारी कालवी,
डंका रे जोडे दौडे़ रे,
अरे पाबू थारी कालवी,
हे ऊबा ऊबा आकाशा रा,
तारा तोडे रे,
के पाबू भालाला,
अरे ऊबा ऊबा आकाशा रा,
जियो जियो के पाबू भालाला,
राठौडी शूरो अमर वेगो रे,
ए हे किल्ला आगे चोतरी,
हनुमान गोडी ढाली रे,
अरे किल्ला आगे चोतरी,
हे उठते हनुमान बाबो,
हाकल दिनी रे,
के जटाधारी नेे,
अरे उठते हनुमान बाब,
जियो जियो के जटाधारी नेे,
हनुमान थारा परचा भारी रे,
ए हे सांझ री उडीयोडी कुरजा,
रात कठे रेगी रे,
अरे सांझ री उडीयोडी कुरजा,
हे पाल समंद री पाल पे,
हिलोरा लेती रे,
के उडती कुरजलीया,
अरे पाल समंद री पाल पे,
जियो जियो रे उडती कुरजलीया,
थारी बोली माने मीठी लागे रे,
ए हे पाल समंद रे बाग में,
चम्पा री डाली लागी रे,
अरे पाल समंद री बाग में,
हे जोधाणे आयोडी फौजा,
पाछी भागी रे,
के रंग है राठौडा,
अरे जोधाणे आयोडी फौजा,
जियो जियो रे रंग है राठौडा,
मूछा रे माते ताव दिनो रे,
ए हे मोडकी मगरी रो पानी,
ढालो ढाल ढलीयो,
अरे मोडकी मगरी रो पानी,
ढालो ढाल ढलीयो रे,
अरे आबू थारा पहाडा मे,
अंग्रेज हलीयो रे,
के तीकी टोपी रो,
जियो जियो के तीकी टोपी रो,
अंग्रेज थारो हुनर भारी रे,
गायक – प्रकाश माली जी।
प्रेषक – मनीष सीरवी
हिंदी · Read on Bhajan Baan
Share this bhajan with your family
Send it to your satsang group before kirtan so everyone has the words.
