सेठ बोयतो टेर लगाई थाने समंदर माई
सेठ बोयतो टेर लगाई,
थाने समंदर माई,
डूबे म्हारी नाव बापजी,
देवो जीव बचाई,
मत न देर लगावो जी,
अजमालजी रा कंवरा,
खम्मा खम्मा ओ रामा,
रूनीचे रा धणीया,
चौपड़ रमता रामदेवजी,
भुजा रे पसारी,
बोयता ने पार लगायो,
डूबत नाव ऊबारी,
बोयता रो जीव बचायो जी,
ओ रामा बोयता रो जीव बचायो जी,
एक दिन भाभी रामदेव ने,
यु मेणा री मारी,
बाछडीया ने करो जीवतो,
जद जानु अवतारी,
कैया दुनिया में रामा ओ,
कैया दुनिया में भरम फैलावो जी,
बाछडीया ऊपर हाथ फेरीयो,
जीवन दान दिरायो,
भोजाई ने रामदेवजी,
चमत्कार दिखलायो,
भाभी अचरज लायो जी,
जात पात रो भेद म्हारो,
बाबो आज मिटायो,
दिन दुखी ने अजमल लालो,
गले सु लगायो,
भटकिया ने मार्गीयो ओ,
भटकीया ने मार्गीयो दिखलायो जी,
डालीबाई ने रामदेवजी,
साचो पंथ बतायो,
दया प्रेम सु रेणो बाबो,
सगला ने सिखायो,
डाली सेवा में जीवन लगायो जी,
मरवा लाग्या मिनख धडा धड,
हेजो फैल्यो भारी,
सेवा किनी रामदेवजी,
घर घर जा मिनखा री,
सबरो जीव बचायो जी,
सौरभ फैली रामदेव री,
सारी दुनिया माई,
पग पग माते परचा दिना,
बाबो इन जुग माई,
घर घर यश थारा ओ,
घर घर यश थारा गावे जी,
गायक – प्रकाश माली जी।
प्रेषक – मनीष सीरवी।
(रायपुर जिला पाली राजस्थान)
हिंदी · Read on Bhajan Baan
Share this bhajan with your family
Send it to your satsang group before kirtan so everyone has the words.
